تهريج في تهريج

[center]
معلهش يا جماعه بصراحه الموضوع ده منقول ومعلهش لو فيه بعض الالفاظ بس انا حبيت اوريهولكوا
ندخل على الموضوع

بعد التدقيق الشديد ف شرايط القنوات الفضائية
( شرايط الشات اللى بتبقى متلقحة ف آخر الشاشة !!!! )
و بعد التتنيح بالساعات قدام شاشة التلفزيون ..
استطعت بقدرتى العبقرية و الفذة من نوعها أن أستنتج ...........
ان نص الشعب حتما ًغبى و عايز الحرق !!!!!

لأ اللى بيحصل ده مش طبيعى !!! أنا قريت شوية جُمل يا جماعة بجد تنحت قدامها !!
و بين كل جملة و جملة كان هيجيلى شلل

إليكم الشلل التالى


1- اول رسالة ممكن نلاقيها دايما في القنوات
ممكن حب اسكندرانى

آيوووووووووووه و ماله !!
طبعا زى ما انتوا عارفين فيه حب اسكندرانى و حب قاهرى و فيه فلاحى و فيه صعيدى !!!
و لو مشينا بالحدود شوية هنلاقى فيه حب لبنانى و حب امريكانى و صينى و يابانى !!!!
و هكذا و مقولكوش بقى ع الحب المريخى !!!!
و برضه فيه حب بالفراخ و حب بالكباب و فيه بالشطة و اللمون !!!!!!!
و يا سلام بقى ع الحب بالجبنة !!!
فظييييييييع !!! خصوصا لما بيتقطع عليه طماطم بيبقى مسخرة
ومتنساش كتر الدقة

::::::::::::::::::::::::

2- الرسالة التانية وكتير بنلاقيها
أنا 75 سنة ممكن أتعرف على ليدى مناسبة

خمسة وسبعين سنة يخرب بيته و قادر يمسك الموبايل و يبعت مسج ؟؟!!!
ما شاء الله لسه ف عز شبابه برضه !!
آه و ماله ممكن تتعرف على كركوبة مناسبة
وطبعا علشان مش هيخلفوا عيال
يبقي يتبنوا عيل طالع ع المعاش
بيلعب في ال 60 سنة
يا اخى روح شوف قبر يلمك
ولا شوف ايه اللى عملته غلط في حياتك وحاول تصلحه

:::::::::::::::::::::::::

3- والرسالة دى بقي بتبقي موجودة اكيد طبعا يوميا روتين على القنوات
ممكن واحدة جميلة للصداقة و الحب و ياريت برضه للسفر

آه ممكن طبعا !!! و يا ترى حضرتك عايزها كام سلندر ؟؟؟؟؟؟؟؟؟؟
ويا ترى يا حبيبي يا ترى انت فين يا حبيبي يا ترى

::::::::::::::::::::::::::::::

4- رسالة من الرسالات الغريبة
أنا شاب متدين ممكن ليدى عندها شقة

آه و ماله !! و فيه برضه شقة و عليها ليدى مجانا !!!!
و ياترى ايه مواصفات الشقة اللى عايزها ؟؟؟؟؟؟؟؟؟؟؟؟؟؟
دا باين عليه كدا خلبوص كبير وبيستخبه في قناع الدين

:::::::::::::::::::::

5
أنا دلوعة و شبه نانسى عجرم ممكن أتعرف

يا سلام آه و نص !! و ياترى واخدة من نانسى عجرم قفاها و لا كعب رجليها ؟؟؟؟؟
اتدلعى يا اوختى و ماله !! و لما حضرتك أمورة كده امال بتعرضى نفسك ليه ع الشاشة ؟؟؟
ايه محدش راضى يشترى خلقة نانسى عجرم ؟؟؟
ايه الرجالة بقت بتطس ف نظرها ؟؟؟؟؟؟؟؟؟؟؟؟؟ لأ معندهمش حق

::::::::::::::::::::::::::

6
أنا ف اعدادى ممكن أتعرف على بنت حلوة

هيا جات عليك ؟؟!! و ياترى عايزها ف سنة كام يا حبيبى ؟؟؟؟؟ ابتدائى و لا حضانة ؟؟؟؟؟؟؟
أنا بالشكل ده هيجيلى السكر
يا مين يدينى رقم ابوه

::::::::::::::::::::::::

7
فلانة : أنا نكدية موت ممكن أتعرف على نكدى و ننكد على بعض
فلان : أنا نكدى مووووت !! و قعتك سودة و نهارك مش باينله لون

كان نفسى أمسكهم هما الجوز و انكد على أهاليهم

::::::::::::::::::::::

8
معاكى فلان ممكن أعرف اسمك سنك طلباتك

آه و ماله أنا فلانة يا ابنى ... و النبى اطلبلى واحد كباب و اتنين بانيه !!!!
احم احم .. و ياريت لو معاهم جوز حمام

::::::::::::::::::::::

9
أنا عايز بنت للارتباط سمرا أو بيضا أو قمحى ما تفرقش

حمرا !!!!!!!!!!!!
تاخدها حمرا ؟؟؟؟؟؟؟؟؟؟؟ طب ايه رأيك ف البنفسجى ؟؟؟؟
جديد و منزلش السوق
انت مش عايز تتعرف انت عايز تتسلي يا ابن القرود

::::::::::::::::::::::::::

10
أنا سى السيد بدور على أمينة تسمع الكلام و تقول حاضر

آه و ماله حاضر يا اخويا !!! بقى حضرتك عايز أمينة ؟؟؟؟
طب غووووووووووووووور الله يحرقك
تلاقيك انت امينة
بكرة تلاقي سى السيد اللى يلمك

:::::::::::::::::::::

11
لو انت بتحبنى بجد ممكن أديلك رقمى !!

يا ما شاء الله !!! انتوا بتحبوا بعض الأول و بعدين تتعرفوا على بعض ؟؟؟؟
تصدقى بالله أنا دلوقتى بس عرفت أهمية السراية الصفرا

:::::::::::::::::::::::::::

12
أنا قلبى فاضى .... حد عايزنى أحبه ؟؟؟

لا تعليق

:::::::::::::::::::

15
فلانة : عرفنى على نفسك يا فلان و ابعت رقمك .. أنا بحبك أوى ،
فلان : أنا اللى بحبببببببك أوييييى يا فلانة !! قوليلى صحيح هو انتى حلوة و لا ؟؟؟؟؟؟؟؟لأ

لما انت مشوفتهاش واول مرة تكلمها
طب بتحبها على ايه يا ابن تيييييييييييييييييييييت

::::::::::::::::::::::::::::::::::::::

كلمة أخيرة :
اللى بيحصل ده كتيييييييييير .. شئ ميبقبلوش لا قلب و لا عقل ولا منطق .. استهتار و استخفاف
بالمشاعر و كذب مالوش نهاية و ضحك ع العقول !!!!
و الدهشة انه كل اتنين بينافقوا بعض و الوسيلة الرخيصة ...... الحب !!!!!!
مع ان كل كلمة حب غالية أوى .... ايه اللى جرى للناس ؟؟؟؟؟؟
و ايه اللى جرى للمجتمع ؟؟؟؟؟؟؟؟؟؟
امتى هنفوق بقي ؟ ونفكر بعقل شويا
امتى هنكبر ؟ ولا طول عمرنا هنبقي صغار؟
امتى وامتى وامتى
عايزين الحقيقة المجتمع ده عايز اعادة بناء
علشان اللي بيحصل ده تهريج وزاد عن حده
ولا انت رأيك إيه































0

[center]
واليكم رد من الردود
و فيه تبادل أرقام تيليفونات بالشهور
فودافون أكتوبر يونيو
يعني فودافون 010
و يونيو سبتمبر 01069 و هكذا إلى آخر الرقم
شكلي هكتب رقمي و أتوقف

هو الموضوع تسلية بردو
زي الشات ع النت